中国人要垃拉两个人里向确定一个赢家，或者垃拉两个人里向挑选出一个人，有一个老便当个办法，就是迭两个人同时出手，用手形定输赢。搿种办法上海闲话叫“啋咚里啋”，北方闲话叫“石头剪子布”，不过现在情况勿一样了，我问几个上海小囡：“晓得啥叫啋咚啋?”伊拉讲：“阿拉勿晓得。”我再问：“晓得啥叫石头剪子布?”伊拉讲：“晓得个。”我有点感慨：原汁原味个上海闲话“啋咚里啋”慢慢叫要消失了，连上海电视娱乐节目里个沪籍主持人也用“石头剪子布”代替“啋咚里啋”了。

　　老早仔，上海闲话里向，一个人能干手巧叫拁【jhia】，像“迭个小姑娘手拁来，样样事体侪会做”，现在除脱年纪老大个老上海以外，一般年纪轻个人已经勿晓得啥叫拁【jhia】了。我小辰光，“鸟”是读【diao】个，“天上一只鸟”讲“天浪一只【diao】”，我读初中个辰光，“鸟”就读【niao】了。旧年仔搭，我看新版电视连续剧《水浒传》，里向个人也讲【diao】，迭个【diao】是古音，【niao】是现代音。上海闲话里个“维”【fhi】，现在交关小囡讲勿来了，伊拉讲“维生素”，阿拉听起来像是“卫生素”，伊拉讲“潍坊路”(垃拉浦东)，阿拉听起来像是“卫坊路”。数字“二”个读法最复杂了，阿拉老早数数字是搿能数个：一、二【ni】、三、四……，现在大家侪搿能数：一、二【liang】、三、四……。实际浪，迭个两种读音垃普通话里是勿一样个：二【ni】是序数，序数要读【ni】;二【liang】是基数，基数要读【liang】。乐器“二胡”、乐曲“二泉映月”，老上海闲话讲“【ni】胡”“【ni】泉映月”，现在年纪轻个人讲“【er】胡”“【er】泉映月”。再数下去，十七、十八、十九、廿……，廿就是20，大写是“念”，读音也是“念”，现在20读成“念”个上海人少多了，越来越多个上海人侪读【ersek】【二十】了。不过再朝后头又变了：廿一、廿二【nieni】、廿三、廿四……。过了三十，“二”又读【liang】了，上海个42路公交车，大家侪讲“四十【liang】路”公交车，22路电车就勿好讲“廿【liang】路”电车，更加勿好讲【ersek liang】路电车。侬看搞勿搞?

　　上海闲话个语法也有一眼眼变化。1950年代，上海人受苏州话影响用“阿……?”来表示疑问比较多，搿歇辰光，大家讲“阿对?”【对吗】，“阿好?”【好吗】，“阿晓得”【知道吗】，现在除脱上海北部郊区宝山、嘉定乡下头还搿能讲，市区个人一般侪讲“对?”，“好?”“晓得?”搿个是回到原来的老上海话讲法。

　　上世纪90年代初，上海闲话里出现了一种极具表现力个句式：“勿要忒【tek】……噢”，意思与古文“不亦……乎”一样，最初是出现垃拉大学校园里向，后来迅速个传到社会浪。侬想讲“邪气开心”，侬就讲“勿要忒开心噢”，“勿要忒开心”比“邪气开心”还要开心;侬想讲“邪气清爽”，侬就讲“勿要忒清爽噢”。“勿要忒……”本生是大学生里向讲讲个，现在全上海【搭仔上海周边地区】侪搿能讲了，连得广告商也来轧闹猛，老早仔有一只广告：“?菖?菖牌西服，勿要忒潇洒”。侬看，新个说法越来越有市面啦!